Монгол улсын нийгмийн хамгааллын хэлэлцээр бүхий улс орнуудын цар хүрээ улам бүр өргөжин тэлж байна. Тухайлбал Монгол улс, Бүгд найрамдах Турк улсын Засгийн газар хооронд нийгмийн хамгааллын хэлэлцээр байгуулах ажил ахицтай явагдаж байна.
2013 онд хамтын ажиллагааны талаарх анхны төслийг солилцсоноос хойш Турк улсад байгаа Монгол улсын иргэдийн тоо, ажил үүрэг эрхэлж байгаа байдал, Монгол улсад амьдарч байгаа Турк иргэдийн талаарх холбогдох тоо баримтуудыг нэгтгэж, шилжилт хөдөлгөөнд дүн шинжилгээ хийх, хэлэлцээрт сайжруулалт хийх ажлуудыг шат дараатай зохион байгуулж ирсэн юм.
Тэгвэл энэ удаа тус улсын Хөдөлмөр, Нийгмийн хамгааллын яамны Гадаад харилцаа, гадаад хөдөлмөр эрхлэлтийн газрын дарга Найм Гурхам Кексин, мэргэжилтэн Фатих Уясал, мэргэжилтэн Асуман Акташ, БНТУ-ын Хөдөлмөр, Нийгмийн хамгааллын яамны Тэтгэврийн газрын гадаадын гэрээт ажилтан, тэтгэврийн хэлтсийн дарга Залиф Мэрт, Нийгмийн хамгааллын ерөнхий газрын мэргэжилтэн Бугра Пойраз нар 2016 оны 04 дүгээр сарын 03-09-ний өдрүүдэд Монгол улсад албан томилолтоор ажиллаж байна. Албан томилолтын хугацаанд Хүн амын хөгжил нийгмийн хамгааллын яам болон Нийгмийн даатгалын ерөнхий газрын бодлого чиглэл, үйл ажиллагаатай танилцаж, хэлэлцээрийн төслийг боловсронгуй болгох чиглэлээр ажиллах юм.
Нийгмийн хамгааллын салбарт хамтран ажиллах Засгийн газар хоорондын хэлэлцээрийг одоогийн байдлаар Оросын холбооны улс /1961.04.06/, Бүгд найрамдах Солонгос улс/2006.05.08/, Бүгд найрамдах Унгар улс/2011/06/10/ зэрэг улс орнуудтай байгуулж, хоёр улсад нийгмийн даатгал давхардуулан төлөхгүй байх, тухайн улсуудад ажилласан жилийг баталгаажуулах, шилжүүлэн тооцох зэргээр Монгол улсын иргэдийн нийгмийн баталгааг сайжруулах чиглэлд ажиллаж байна.
